एडिलेड । भारतले ट्वान्टी–२० विश्वकप सुपर–१२ को ग्रुप–२ को रोमाञ्चक खेलमा बंगलादेशलाई डक वर्थ लेविस नियममा ५ रनले पराजित गर्दै आफ्नो सेमिफाइनल यात्रा सम्भावना बलियो बनाएको छ । जितका लागि १६ ओभरमा १५१ रनको नयाँ लक्ष्य पाएको बंगलादेशले छ विकेट गुमाएर १४५ रन मात्र बनाउन सक्यो ।
जितपछि भारतको ६ अंक भएको छ । जितसँगै भारत समूहको शीर्ष स्थानमा उक्लेको छ । बंगलादेश भने ४ अंकसहित तेस्रो स्थानमा कायम छ । भारतको अन्तिम खेल जिम्बावेविरुद्ध रहेको छ भने बंगलादेशले पाकिस्तानको सामना गर्नेछ । बंगलादेशलाई अन्तिम ओभरमा जितका लागि २० रन चाहिएको थियो । अन्तिम बल पुग्दा जितका लागि ७ रन चाहिएको थियो । तर त्यसलाई हात पार्न सकेन ।
खेल वर्षाले अवरोध पुर्याएपछि बंगलादेशले जितका लागि १६ ओभरमा नयाँ विजयी लक्ष्य १५१ रन तय भएको थियो । सातौं ओभरको समाप्तिमा पानी पर्न शुरु भएको थियो । त्यति बेला बंगलादेश बिना कुनै विकेटको क्षति ६६ रन बनाएर मजबुत स्थितिमा थियो । फेरि खेल शुरु भएलगत्तै लिटन दास ६० रन बनाएर रनआउट भए र खेल भारतको पक्षमा मोडिएको थियो ।
टस हारेर पहिले ब्याटिङको निम्तो पाएको भारतले २० ओभरमा ६ विकेट गुमाएर १८४ रन बनाएको थियो । त्यसमा दुई अर्धशतकीय इनिङ्स सामेल रह्यो । प्रारम्भिक ब्याटर केएल राहुलले लयमा फर्किंदै ३२ बलमा ५० रन बनाए भने विराट कोहलीले नटआउट रहेर ४४ बलमा ६४ रन बनाए । यस्तै सूर्यकुमार यादवले ३० रन बनाए । बंगलादेशी बलरमध्ये हसन महमुदले तीन तथा साकिब अल हसनले २ विकेट लिए ।
