काठमाडौं । काठमाडौं जिल्ला प्रशासन कार्यालय कोरोना भाइरस नियन्त्रणका लागि छलफलमा जुटेको छ । पछिल्लो समय गृह मन्त्रालयले बढ्दो कोरोना संक्रमितसँगै सतर्कता अपनाउन निर्देशन दिएको थियो ।
सोही निर्देशन र बढ्दो प्रकोपलाई ध्यानमा राखी काठमाडौंमा कोरोना महामारी फैलिनबाट रोक्नका लागि जि.प्र.का पूर्वतयारीका लागि छलफलमा जुटेको हो ।
यसअघि अर्थमन्त्रालयले पनि विश्वका अन्य मुलुकहरूमा कोरोना भाइरस सामान्यीकरण हुँदै गएपछि छिमेकी देश चीन र भारतमा बढ्दै गएकाले यहाँ पनि फैलिन सक्ने हुँदा सुरक्षा सतर्कता आपनाउन भनेको थियो ।
फेरि पनि सार्वजनिक स्थानमा भिडभाड नगर्ने, भौतिक दूरी कायम गर्ने, मास्क तथा सेनिटाइजरको प्रयोग अनिवार्य गर्ने/गराउने तथा अन्य विविध विषयमा छलफल सुरू भएको छ ।
अर्काेतर्फ स्वास्थ्य मन्त्रालयका प्रवक्ता डा. सञ्जय कुमार ठाकुर भने हाल नेपालमा नयाँ भेरियन्ट नआइसकेको र संक्रमितको संख्यामा पनि वृद्धि नभएको दाबी गर्छन् ।
उनका अनुसार दैनिक हजारजनामा परीक्षण गर्दा एक/दुईजनमा मात्रै संक्रमण देखिएको छ । यद्यपी सतर्कता भने आवश्यक रहेको उनको भनाई छ । ‘हमी हिजो पनि डराउनुपर्ने अवस्था थिएन र आज पनि छैन,’ उनले भने, ‘नेपालमा नयाँ भेरियन्ट आएको छैन । तर, छिमेकी देशमा देखिएको हुँदा हामीले नाकामा कडाइ सुरू गरिसकेका छौं ।’
उनका अनुसार मन्त्रालयले भारततर्फका १४ वटा, चीनतर्फका दुईवटा नाका, दुईवटा अन्तर्राष्ट्रिय विमानस्थलमा रहेका ‘हेल्थ डेस्क’ लाई थप सक्रिय बनाइएको छ ।
