काठमाडौं । भ्रष्टाचार अभियोगमा सर्वोच्च अदालतले दोषी ठहर गरेको प्रहरी उपरीक्षक(एसपी) रामेश्वर प्रसाद यादव सेवाबाट बर्खास्त भएका छन् ।

जिल्ला प्रहरी कार्यालय सिन्धुपाल्चोकमा कार्यरत उनलाई विशेष अदालतको फैसला उल्ट्याउँदै सर्वोच्च अदालतले गत पुस ५ मा दोषी ठहर गरेको हो ।

मुद्दा परेसँगै निलम्बनमा परेका उनीसहित अर्का हवल्दार ढकबहादुर गुरूङ पनि बर्खास्तमा परेका हुन् । विशेष अदालतले दुवैलाई यस मुद्दामा सफाइ दिएपछि आयोगले सर्वोच्चमा पुनरावेदन दिएको थियो । उनीहरू द्वयलाई ९७ हजार बिगो मागदाबी गर्दै चार महिना जेल सजाय तोकिएको छ ।

यादव प्रहरी नायब उपरीक्षकका रूपमा रूपेन्देहीमा कार्यरत रहँदा अख्तियार दुरूपयोग अनुसन्धान आयोगले २०७१ सालमा विशेष अदालतमा मुद्दा दायर गरेको थियो । मुद्दा दायर भएको आठ वर्षमा सर्वोच्चले यसको छिनोफानो गरेको हो ।