काठमाडौं। प्रधानमन्त्री पुष्पकमल दाहाल प्रचण्डले नेपालका कम्युनिस्टहरूको एउटै केन्द्र बनाउने पहल सुरु भएको बताएका छन् । शुक्रबार प्रधानमन्त्री कार्यालय सिंहदरबारमा नेकपा बहुमतका नेताहरूसँगको भेटमा उनले सच्चा कम्युनिस्ट पार्टीहरूबीच एउटै कम्युनिस्ट केन्द्र बनाउन आवश्यक रहेको बताएका हुन् ।

‘समाजवादोन्मुख व्यवस्था हामीले संविधानमै गरिसकेका छौं । यसलाई सामान्य अर्थमा यसलाई बुझ्न मिल्दैन । दलहरूबीच समाजवादी बाटोमा जाने बारेमा छलफल भइरहेको छ’, संयोजक धर्मेन्द्र बास्तोलाको ज्ञापनपत्र बुझ्दै उनले भने, ‘समाजवादी यात्राको गन्तव्यमा पुग्नका लागि एउटै कम्युनिस्ट केन्द्र बनाउन आवश्यक छ ।’

भेटमा नेकपा बहुमतका नेताहरूले प्रधानमन्त्रीसमक्ष राष्ट्रियता, जनतन्त्र र जनजीविकासँग सम्बन्धित विभिन्न मागहरू प्रस्तुत गरेका थिए ।