काठमाडौँ । प्रिमियर लिग क्लब आर्सनलले ला लिगा क्लब सेभियालाई इमिरेट्स कपमा ६-० गोल अन्तरले पराजित गरेको छ ।

आफ्नो घरेलु मैदानमा आर्सनलले पाहुना टोली सेभियालाई फराकिलो अन्तरले हराएको हो ।

आर्सनलको जितमा केहि साताअघि म्यानचेस्टर सिटीबाट आर्सनल आएका गाब्रियल जिससले ह्याट्रिक गरेका थिए । त्यस्तै बुकाया साकाले २ तथा एडी केतिहले एक गोल गरेका थिए । 

२००७ देखि आर्सनलको मुख्य प्रायोजक रहेको इमिरेट्सको नामबाट प्रि-सिजनमा शुरु भएको यस प्रतियोगिता आर्सनलले यो सहित छैटौं पटक जितेको छ ।

योसँगै आर्सनलको प्रि-सिजनका खेलहरु सकिएका छन् । अब आर्सनलले अगस्त ६ मा प्रिमियर लिगको यस सिजनको पहिलो खेल अन्तर्गत क्रिस्टल प्यालेसको सामना गर्ने छ ।