चीनको चेतावनीका बीच ताइवान पुगिन् पेलोसी

काठमाडौँ । अमेरिकी संसद् हाउस अफ रिप्रिजेन्टेटिभकी सभामुख न्यान्सी पेलोसीले ताइवान पुगेकी छन् । चीनको कडा चेतावनीका बाबजुद अमेरिकी सभामुख पेलोसी मंगलबार ताइवान पुगेकी हुन् ।

चीनको पटक पटकको चेतावनीका बाबजुद पेलोसीको विमान मंगलबार साँझ ताइपेईमा अवतरण गरेको रोयटर्सले उल्लेख गरेको छ । 

मिडिया रिपोर्टका अनुसार पेलोसी मलेसियाबाट मंगलबार ताइवान पुगेकी हुन् । पेलोसीलाई अमेरिकी नौसेना र वायुसेनाका २४ उन्नत लडाकु विमानहरूले  सुरक्षा प्रदान गरेका थिए ।

चीनले पेलोसीको विमान ताइवान आएमा चिनियाँ वायुसेनाको विमानले पेलोसीको विमानलाई घेर्ने बताएको थियो । तर चीनको चेतावनीका बाबजुद पेलोसी ताइवानमा अवतरण गरेकी छन् ।

यसैबीच चीनले ताइवान सीमानजिकै सैन्य अभ्यास पनि गरेको छ भने अमेरिका, ताइवान र चीनले आफ्ना सेनालाई युद्धका लागि तयार राखेका छन् ।