टर्कीमा अनौठो सडक दुर्घटना, ३४ जनाको मृत्यु (भिडियोसहित)

काठमाडौँ । टर्कीमा एउटा दुखद तर अनौठो सडक दुर्घटना भएको छ ।

यहाँको गजियनटाप सहरमा शनिबार एउटा कार पल्टिएको थियो । त्यसमा चारजना घाइते भएका थिए । एम्बुलेन्स र प्रहरी टोली घटनास्थल पुगेको थियो । वरपर धेरै मान्छे जम्मा भएका थिए । कार दुर्घटनामा परी घाइते भएकाहरुलाई प्राथमिक उपचार गरी एम्बुलेन्समा सार्ने तयारी गरिएको थियो । यसैबीच, अर्को भयानक दुर्घटना भयो ।

मिडिया रिपोर्टका अनुसार पुलिस र मेडिकल टोलीले कारमा रहेका मानिसहरूलाई बाहिर निकालेका थिए र एम्बुलेन्सबाट अस्पताल लैजाने तयारी गरिरहेका थिए । घटनास्थलमा धेरै मानिसहरु उपस्थित थिए । सोही क्रममा टाढाबाट आइरहेको निलो रंगको बस अनियन्त्रित भएर भिडमाथि चढेको थियो । यस घटनामा अहिलेसम्म ३४ जनाको मृत्यु भएको पुष्टि भएको छ । २९ जना घाइते भएको बताइएको छ ।

यसको भिडियो भाइरल भइरहेको छ ।