काठमाडौँ । कलाकार हरिवंश आचार्यले आगामी चुनावमा आफू कसैको प्रचारक हुन नसक्ने बताएका छन् । आज (मंगलबार) सामाजिक सञ्जाल फेसबुकमा स्टाटस लेख्दै आचार्यले कसैको पक्षमा भोट माग्न र कसैको प्रचारक हुन नसक्ने आफूहरूको बाध्यता भएको बताएका हुन् ।

चुनाव नजिकिँदै गर्दा आफूहरूबाट आशा राख्नु स्वाभाविक भएको उल्लेख गर्दै उनले आफूहरू सबै राजनीतिक दल र सबै उम्मेदवारको साझा मानिस भएको बताएका छन् ।

उनले लेखेका छन्, ‘कतिले बिर्सनै नसकिने गुन लगाएका हुन्छन् । कतिसँग गहिरो मित्रता हुन्छ । कतिसँग नाता गाँसिएको हुन्छ । देशमा जब निर्वाचन नजिकिन्छ । त्यसबखत ती मित्रता, ती नाता र आत्मीय सम्बन्ध गासिएका व्यक्तिहरू निर्वाचनमा उम्मेदवार बन्दछन् । त्यसबखत हामीसँग केही आशा राख्नु स्वाभाविक हो । मलाई चुनावमा मद्दत गरिदेला, मेरो पक्षमा भोट मागिदेला भनेर । तर हामी सबै राजनीतिक दल, सबै उम्मेदवारका साझा मानिस हौँ । ब्यालेटबक्समा खसाल्ने मतपत्र को कुन चिन्न रोज्ने भन्ने कुरा स्वविवेक हो ।’

आचार्यले अगाडि भनेका छन्, ‘कसैको पक्षमा भोट माग्न, कसैको प्रचारक हुन सकिँदैन, यो हाम्रो बाध्यता हो । त्यसैले मित्रता, आत्मीयता, नातालाई पवित्र नै राखी चुनावमा हामीबाट प्रचारप्रसारको आशा नगरी दिन अनुरोध गर्दछु ।’