काठमाडौं । प्रमुख प्रतिपक्ष दल कांग्रेसले राष्ट्रिय सभा उपाध्यक्ष पदमा माओवादी केन्द्रका उम्मेदवार उर्मिला अर्याललाई समर्थन गर्ने निर्णय गरेको छ ।

आइतबार बिहान कांग्रेस सभापति शेरबहादुर देउवा निवास धुम्बाराहीमा बसेको संसदीय समितिको बैठकले आफूले उम्मेदवारी नदिने निर्णय गरेको कांग्रेसका प्रमुख सचेतक रमेश लेखकले जानकारी दिए ।

सत्ता गठबन्धनले अर्याललाई साझा उम्मेदवार बनाउने निर्णय गरेको छ । अर्यालले दिउँसो आफ्नो उम्मेदवारी दर्ता गराउँदै छिन् । उनी गत वर्ष भएको राष्ट्रिय सभा सदस्य निर्वाचनमा मधेश प्रदेशबाट निर्वाचित भएकी थिइन् ।

राष्ट्रिय सभा उपाध्यक्ष पदका लागि आज दिउँसो १ बजेदेखि ४ बजेसम्म उम्मेदवारी दर्ताको समय तोकिएको छ । सोमबार निर्वाचन हुनेछ । विपक्षीलेसमेत समर्थन गरेपछि अर्याल सर्वसम्मत उम्मेदवार भएकी छिन् ।