लिज ट्रस कन्जरभेटिभ पार्टीको नेतामा विजयी
काठमाडौँ । बेलायतको कन्जरभेटिभ पार्टीको नेतामा लिज ट्रस विजयी भएकी छन् । ट्रसले आफ्ना प्रतिद्वन्दी ऋषि सुनकलाई पराजित गर्दै पार्टीको नेतामा विजयी भएकी हुन् ।
पार्टीको नेतामा विजयी भएपछि अब ट्रस बेलायतको नयाँ प्रधानमन्त्री हुने छिन् । ट्रसले ८१ हजार ३२६ मत पाएकी छन् भने सुनकले ५० हजार ३९९ मत पाएको घोषणा गरिएको छ ।
नेता चयन गर्न केही सातादेखि विभिन्न चरणमा मतदान भएको थियो ।
ट्रस मारगेट थ्याचर र थेरेसा मेपछि देशको तेस्रो महिला प्रधानमन्त्री बन्ने भएकी छन् । मतदान गर्न योग्य अनुमानित २ लाख टोरी सदस्यहरूबाट हुने नेतृत्व चयनका लागि ४७ वर्षीय ट्रसले आफ्ना प्रतिष्पर्धी ४२ वर्षीय सुनकलाई पछि पारेकी छन् । आर्थिक अनियमितता र काण्डपछि बोरिस जोनसनले राजीनामाको घोषणा गरेसँगै नेतृत्वको प्रतिष्प्रर्धा जुलाईबाट सुरु भएको थियो ।
८ साता लामो अभियानपछि शुक्रबार हुलाक तथा अनलाईन भोटिङ सम्पन्न भएको थियो ।
