काठमाडौं । यस वर्षको दशैँ आज (सोमबार) बाट शुरु भएको छ । घरघरमा सोमबार घटस्थापना गरिएको छ । आज नेपालीले घरघरमा घटस्थापनासहित जमरा राखेर नवदुर्गामध्येकी पहिलो देवी शैलपुत्रीको आह्वान गरी विधिपूर्वक पूजा आराधना गरेका छन् ।

दशैँ सुरु भएसँगै काठमाडौं उपत्यकाका बजारमा भिडभाड बढेको छ । असन, इन्द्रचोक, न्यूरोडसहितका मूख्य बजारमा भिडभाड बढेको हो । सोमबार दशैँको पहिलो दिन हो भने १९ असोज बुधबार दशैंको टीकाको दिन हो ।

दशैं शुरु भएसँगै पढाई, रोजगार र व्यापारको सिलसिलामा काठमाडौं आएकाहरु धमाधम गाउँ फर्किन लागेका छन् । यही बेला काठमाडौंका मुख्य व्यापारिक क्षेत्रमा किनमेल गर्नेको भीड बढ्दै गइरहेको छ ।