मकवानपुर । पार्टीको आधिकारिक उम्मेदवारलाई पन्छाएर राप्रपा नेपाललाई सहयोग गर्ने केन्द्रको निर्णयको विरोधमा नेकपा एमालेको जिल्ला पार्टी कार्यालय मकवानपुरमा तालाबन्दी गरिएको छ ।
एमाले जिल्ला इन्चार्ज रामेश्वर राना पक्षका कार्यकर्ताले जिल्ला पार्टी कार्यालयमा तालाबन्दी गरेका हुन् । राना एमालेबाट मकवानपुर–१ मा टिकटका दाबेदार थिए। शुक्रबार साँझ नै उनलाई मकवानपुर १ मा उम्मेदवार बनाउने निर्णय समेत भइसकेको थियो । तर, शनिबार साँझ क्षेत्रीय कमिटीको सिफारिसविपरीत पार्टी अध्यक्ष केपी ओलीले कमल थापालाई समर्थन गर्ने निर्णय गरेका थिए ।
टिकट ल्याएका थापा एमाले जिल्ला पार्टी कार्यालय आउने तयारी गरिरहेको बेला एमालेका असन्तुष्ट कार्यकर्ताले तालाबन्दी गरेका हुन् । तालाबन्दी पछि पार्टी कार्यलयमा सुरक्षाकर्मी परिचालन गरिएको छ । तालबन्दीका बिषयमा प्रतिक्रिया दिँदै एमाले बागमती प्रदेश सचिवालय सदस्य एवं राष्ट्रिय सभा सदस्य रामचन्द्र राईले नेतृत्वले गरेको गलत निर्णयको विरोधमा कार्यकर्ता उत्रिएको बताए । यद्यपि नेतृत्वको निर्णयविरुद्ध जान भने नसकिने उनको तर्क छ ।
