काठमाडौं । प्रधानमन्त्री शेरबहादुर देउवाले जनता समाजवादी पार्टी (जसपा) का मन्त्रीहरुलाई हटाउने तयारी अगाडि बढाएका छन् । जसका लागि सत्ता गठबन्धन दलका शीर्ष नेताहरुको बैठक बस्ने भएको छ । प्रधानमन्त्रीको सरकारी निवास बालुवाटारमा दिउँसो २ बजे बैठक बोलाइएको छ ।
प्रतिनिधि तथा प्रदेशसभा निर्वाचन र सत्ता साझेदार जनता समाजवादी पार्टी (जसपा) नेपालबारे छलफल गर्न बैठक बस्न लागेको हो । बैठकमा सत्ता गठबन्धनमा रहेका दलहरुबाट प्रतिनिधिसभा र प्रदेशसभामा परेको बागी उम्मेदवारी र जसपाबाट सरकारमा रहेका मन्त्रीहरुका बारेमा छलफल हुने बताइएको छ ।
जसपाले सत्ता गठबन्धन छाडेर प्रमुख प्रतिपक्षी नेकपा एमालेसँग चुनावी तालमेल गरेका कारण उक्त पार्टीका मन्त्रीहरुलाई राजीनामा दिन आग्रह गर्ने वा बर्खास्त गर्ने भन्ने बारेमा छलफल हुने बताइएको छ । एमालेसँग चुनावी तालमेलमा रहेको जसपाबाट प्रदीप यादव वन, मोहम्मद इस्तियाक राई भौतिक पूर्वाधार तथा यातायात, राजेन्द्र श्रेष्ठ संघीय मामिला तथा समान्य प्रशासन र मृगेन्द्रकुमार सिंह कृषिमन्त्री छन् ।
