काठमाडौं । नेकपा एकीकृत समाजवादीका अध्यक्ष माधवकुमार नेपालले भविष्यका प्रधानमन्त्री आफूहरु नै भएको बताएका छन् । नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड र आफूमध्ये नै एक हुने उनको भनाइ थियो ।
‘भविष्य गठबन्धन दलकै छ । केन्द्रबाट मन्त्रिपरिषदबाट कानुनी अवरोधहरु आउँलान् । वर्तमान प्रधानमन्त्री र भविष्यका प्रधानमन्त्रीहरू पनि यहीं छन्,’ उनले देउवा र प्रचण्डतिर इशारा गर्दे भने ।
उनले मुलुकको महत्वपूर्ण संसदको सभामुखको जिम्मेवारी सम्हालेकी ओनसरी घर्तिमगरले उम्मेदवारी दिएको र गठबन्धन दललाई विजयी बनाउनुपर्ने बताए ।
‘हामीले मुलुकलाई ठूलो दुर्घटनाबाट बचाएका छौं । वाम लोकतान्त्रिक गठबन्धनले मुलुकलाई जोगायो । भोलिका निम्ति फेरि पनि खतरा विद्यमान छ। देशले लोकतन्त्रको माग गरेको छ,’ उनले भने । देशले निरंकुशता र अधिनायकवादको माग नगरेको भन्दै गठबन्धन उम्मेदवारलाई विजयी गराउन आग्रह गरे। उनले भने, ‘हामी देश विकासको पक्षमा छौं ।’
