पाँच दिने नेपाल भ्रमण पुरा गरेर स्वदेश फर्किए भारतीय सेनाध्यक्ष पाण्डे
काठमाडौं । भारतीय सेनाका स्थल सेनाध्यक्ष जनरल मनोज पाण्डे पाँच दिने नेपाल भ्रमण पुरा गरेर स्वदेश फर्किएका छन् । नेपाली सेनाले जनरल पाण्डे विहिवार स्वदेश फर्किएको जानकारी दिएको छ ।
भदौ १९ गते आइतबार काठमाडौँ आइपुगेका जनरल पाण्डेले भ्रमणका क्रममा परम्परा अनुसार राष्ट्रपति भण्डारीले एक विशेष समारोहका बीच नेपाली सेनाको मानार्थ महारथी दर्जा प्रदान गरेकी थिइन् ।
भ्रमणका क्रममा भारतीय सेनाध्यक्ष पाण्डेले सैनिक मञ्च टुँडिखेलस्थित विर स्मारकमा श्रद्धाञ्जली अर्पण र जङ्गी अड्डामा सम्मान गारत निरीक्षण गरेका थिए ।
त्यस्तै पाण्डेले प्रधानसेनापति शर्मासँग भेटघाट एवं छलफल, भारतीय सेनाको तर्फबाट नेपाली सेनालाई सहयोग स्वरुप प्रदान हुने विविध सामग्रीहरुको हस्तान्तरण गरेका थिए । साथै उनले कमाण्ड तथा स्टाफ कलेजका शिक्षार्थीहरुसँग अन्तरक्रिया र मध्य कमाण्ड मुख्यालयको भ्रमण गरेका थिए ।
यस्तै उनले भ्रमणको क्रममा प्रधानमन्त्री तथा रक्षा मन्त्री शेरबहादुर देउवासँग शिष्टाचार भेट गरेका थिए ।
