Naya Page

माधव नेपालको चेतावनी : पार्टीमा गुटबन्दी गरिए कारबाही हुन्छ

काठमाडौं । सत्तारुढ नेकपा (एकीकृत समाजवादी) का अध्यक्ष माधवकुमार नेपालले आफ्नो पार्टीभित्र व्यक्तिवादी चरित्र र गुटबन्दी देखिए कारबाही गर्ने चेतावनी दिएका छन् ।

आज (सोमबार) पार्टी कार्यालय तीनकुनेमा आयोजित नेपाल मगर संघ (समाजवादी) को तेस्रो राष्ट्रिय भेलालाई सम्बोधन गर्दै अध्यक्ष नेपालले एमालेभित्र केपी ओलीमा व्यक्तिबादी चरित्र देखापरेकै कारण आफूहरुले बिद्रोह गर्नुपरेको भन्दै एकीकृत समाजवादीमा कसैले व्यक्तिवादी चरित्र र गुटबन्दी देखिए कारबाही गर्ने चेतावनी दिएका हुन् ।

उनले आफ्नो पार्टी पुरातनवादी पार्टीभन्दा भिन्न पार्टी भएको दावी गरे । उनले यसअघि जनताले दिएको जनमतलाई एकाधिकारवादी बानीले मूल्यांकन गर्न नसक्दा कम्युनिष्ट पार्टीभिन्न भएको बताए ।

पाँच दलको गठबन्धनको सरकारलाई अघि बढाउने काम गरेपछि नेपालको राजनीतिमा नयाँ परिस्थिति सिर्जना भएको उनले बताए । उनले पार्टीलाई जिल्ला जिल्लामा बिस्तार गरी आउने निर्वाचनमा पार्टीलाई भारी मतले जित दिलाउने गरी तयारी गर्न निर्देशन दिए ।